نوێنەری حکومەتی هەرێمی کوردستان لە پۆڵۆنیا بەشداری لە کۆنگرەی نێودەوڵەتی ئاسیا كرد

 زیاد ره‌ئووف  نوێنەری حکومەتی هەرێمى كوردستان  لە پۆڵۆنیا بەشداری له‌ کۆنگرەی نێودەوڵەتی ئاسیا كرد كه‌ له‌ شاری تۆرون له‌ ووڵاتی پۆڵۆنیا به‌رێوه‌ ده‌چێت و چه‌ند رۆژێك ده‌خایێنێت ، ‌وە تیایدا  بەرپرسانی دەسەڵات و نوێنەرانی دەستەی دبلۆماسی و سەرۆکی چەند زانکۆیەکی پۆلۆنیا و پسپۆرانی ئاکادێمی بەشدارییان کرد ، لەوانەشجێگری سەرۆکی هەرێمی کویاڤسکۆ- پەمۆرسکی ، سەرۆکی شاری تۆرون، نوێنەرانی وەزارەتی دەرەوە و وەزارەتی زانست و پەروەردەی پۆڵۆنیا ، باڵیۆزی تایلەند و باڵوێزی مالیزیا و باڵوێزی کۆماری گەلی دیموکراتی کۆریا و باڵوێزی ئازەربێجان و باڵوێزی ئەندەنوسیا ، دیپلۆماتکارانی هیندستان و کازاخستان و ئوزبێکستان هه‌ورها له‌ نێو مێوانان سكرتێری یه‌كه‌می بالیۆزخانه‌ی عیراقی فیدراڵ له‌ وارسۆ ئاماده‌ی پانێڵكه‌ بوو.


وه‌ له‌ رۆژی یه‌كه‌م و پانێلی كردنه‌وه‌ی کۆنگرەکە‌  زیاد ره‌ئووف  نوێنەری حکومەتی هەرێم لە پۆڵۆنیا  وتارێكی پێشكه‌ش كرد و تیایدا تیشكی خسته‌ سه‌ر چه‌ندین ته‌وه‌ر،  به‌راشكاوی باسی له‌وه‌ كرد كه‌ وێرای سەرنجی کۆمەڵگەی نێودەوڵەتی لەسەر جه‌نگى روسیاو ئۆکرانیا چڕکراوەتەوە، دۆخی ئاسیا و بە تایبەتی ڕۆژهەڵاتی ناوەڕاستیش نابێت فه‌رامۆش بكرێت   .
نوێنەری حکومەتی هەرێمی کوردستان لە پۆڵۆنیا باسی لەو کێشانە کرد کە  گه‌ڵی عێراق به‌ گشتی له‌ده‌ستی ده‌نالێنێت ، و کاریگەری راسته‌وخۆشی  لەسەر دۆخی هه‌رێمی کوردستان هەیە ،لەوانەش ئیفلیج کردنی ئیدارەی دەوڵەتی عێراق بەهۆی بێتوانایی لە هەڵبژاردنی حکومەت و سەرۆک کۆماری نوێ، لەماوەی زیاتر له‌ حەوت مانگ پاش هەڵبژاردنەکانی پەرلەمان ،
ناکۆکی لەگەڵ هەرێمی کوردستان دەربارەی نەوت و گاز به‌ بیانوی بریارێكی سیاسی دادگای فیدرالی عیراق  ، زیادبوونەوی چالاکیەکانی داعش،جێبەجێ نەکردنی ڕێککەوتننامەی شنگال و ئەو ململانێیانەی بونەتە هۆی نەگەڕانەوەی ئاوارەکان بۆ شنگال . بەرزبوونەوەی نرخی خۆراک و گۆڕانی کەشوهەوا ئه‌مانه‌ش ته‌ورێكی تر بوون له‌ وتاره‌كه‌ی نوێنه‌ری حكومه‌تی هه‌رێمی كوردستان له‌ پۆڵۆنیا .
زیاد ره‌ئوف له‌ پانێڵی کردنەوەی کۆنگرەی نێودەوڵەتی ئاسیا جەختی لەسەر ئه‌وه‌ كرده‌وه‌ كه‌ بەبێ گوێدانە فرەیی و قەبارەی كێشەكان  حكومەتی هەرێمی كوردستان بەردەوامە لە هەوڵی رێككەوتن لەگەڵ حكومەتى ناوه‌ندی لە بەغدا و بەرنامەی تایبەتی خۆی لە چاكسازی بە ئامانجی هەمەچەشنكردنی ئابووری جێبەجێ دەكات و لە هەمان کات سیاسەتێكی كارای دەرەوە بەڕێوەدەبات .
وە جیگای باسه ،‌  گەشەسەندنێکی باش هەیە لە  پەیوەندییەکانی نێوان پۆڵۆنیا و هەرێمی کوردستان و سەرۆک وەزیرانی پۆڵۆنیا و هەرێمی کوردستان‌ لە ماوەی چەند مانگی ڕابردوودا دوو جار گفتووگۆیان کردووە . بەهێزبوونی بەرچاو لە هاوکارییەکانی نێوان زانکۆکانی پۆڵۆنیا و هەرێمی کوردستان لایه‌نێكی تری وتاره‌كه‌ی زیاد ره‌ئووف بوو له‌ کۆنگرەی نێودەوڵەتی ئاسیا .
وەک هەمیشە بەشداریکردن لە کۆنگرەی ئاسیا دەرفەتێکە بۆ نوێنەری حکومەتی هەرێم لە پۆڵۆنیا بۆ ئەوەی لەگەڵ نوێنەرانی دەسەڵاتدارانی دەوڵەت و حکومەتی خۆجێی پۆڵۆنیا و لەگەڵ باڵیۆزەکاندا گفتوگۆ بکات و لە په‌راوێزی كۆبوونه‌وه‌كان زیاد ره‌ئووف چاوی كه‌وت به‌ زبیگنێڤ ئۆسترۆڤسکی  جێگری سەرۆکی کویاڤسکۆ-پەمۆرسکی و تیشكیان خسته‌ سه‌ر ئامادەکاری بۆ ڕێکخستنی کۆمەڵێک چالاکی و پێشانگای هونەری و نمایشی فیلمی کوردی کە پاییزی ئەمساڵ لە مۆزەخانەی بیدگۆش بەڕێوەدەچێت. مارشال ئۆسترۆڤسکی ڕایگەیاند کە بڕیارە خۆی لە کردنەوەی پێشانگاکەدا ئاماده‌  ده‌بێت.